Павлодар облысында жүк пойызы адам басып өлтірді

Аталған факті бойынша сотқа дейінгі тергеу басталды, деп хабарлайды Pavlodarnews.kz.

Бұл туралы Көліктегі полиция департаменті басшысының бірінші орынбасары Қалижан Қобландин айтты.

2021 жылғы 24 ақпанда сағат 16:22-де Павлодар станциясындағы желілік полиция бөліміне Жолқұдық станциясындағы жүк пойызының машинисінің теміржол өткелінен өтіп бара жатқан адамды белгіленбеген жерде басып кеткені туралы хабарлама келіп түсті. 
Нәтижесінде ер адам алған жарақаттарынан оқиға орнында көз жұмды.

«Біз  азаматтарды жеке қауіпсіздік ережелерін мүлтіксіз сақтауға шақырамыз. Теміржолдардан  өту тек белгіленген және жабдықталған орындарда ғана рұқсат етілетінін еске саламыз», - деп атап өтті Қалижан Қобландин.

Оның айтуынша, жыл басынан бері пойыздарды шұғыл тежеудің 261 фактісі тіркелген, оның 63 - і теміржол төсемінде адамдардың, 192 – і малдың болуына байланысты.
Белгіленбеген орындарда теміржолдан өткендері үшін 144 адам әкімшілік жауапкершілікке тартылды.