Екібастұзда баланы қауып алған иттің иесі 200 мың теңге төлейтін болды

Екібастұз қалалық соты моральдық зиянды өтеу туралы талап арыз бойынша азаматтық істі қарады, деп хабарлайды рavlodarnews.kz.

«Сот ісі бойынша, 2020 жылдың тамызында тұрғын үйдің ауласында осы үйдің тұрғынының иті талапкердің 11 жасар ұлын тістеген. Сот-медициналық сараптама қорытындысына сәйкес баланың денсаулығына жеңіл зиян келтірілген. Екібастұз қаласы полиция басқармасының қаулысымен жауапкер әкімшілік жауапкершілікке тартылды», - дейді облыстық соттың баспасөз қызметінде.

Сот отырысында тараптар татуласып, медиативтік келісім жасасты. Келісім талаптары бойынша талапкер талап қоюдан бас тартса, жауапкер талапкерге 200 мың теңге моральдық зиян төлеуге міндеттелді.