ШұғылҚазақстанда өткен тәулікте 857 адамнан коронавирус инфекциясы анықталды

Шымкенттік экс-шенеунік 10 жылға жаза арқалады

Бұрынғы басқарма басшысы 498 млн теңге бюджет қаржысын талан-таражға салған

Шымкентте экс-шенеунік 10 жылға сотталды. Қалалық сәулет және қала құрылысы басқармасының бұрынғы басшысы 498 млн теңге бюджет қаржысын талан-таражға салғаны үшін жазаға тартылып отыр. Бұл қаражат 2019 жылы қаланың 49 мың 500 гектар аумағына топографиялық түсірілім жасауға бөлінген. Алайда, Жеңіс Байымбетов мемлекеттік сатып алуды жүргізу кезінде заң талаптарын бұзып, лицензиясы жоқ мекеменің тендерде жеңімпаз болуына жол бергені сотта дәлелін тауыпты. Ал тендерде жеңімпаз деп танылған Ақжол Айтбаевтың серіктестігінде мүлдем маманы да, топографиялық түсірілім жасауға құрылғылары да болмағаны сотта айтылды. 

«Ол бөгде адамдарды жұмысқа тарта отырып, қыруар қаржыны қолма-қол ақшаға айналдырумен айналысқан. Соның салдарынан, маңызды іс бітпей қалған»,- деді істі қараған судья  Мадияр Абдрасилов.

«Нәтижесінде, мемлекетпен осы жұмыстарды атқаруға бөлінген 498 млн теңгенің былайша айтқан кезде, түбі жоқ.  Атқарылған жұмыстардың алдағы уақытта қала құрылысындағы басқа да жерлерде ешқандай жарамдылығы жоқ», - деді Шымкент қаласының Әл-Фараби аудандық сотының судьясы Мадияр Абдрасилов.

Еске салайық, Байымбетов былтыр жазда сыбайлас- жемқорлыққа қарсы қызмет өкілдерімен қамауға алынған. Сотта сондай-ақ, экс-шенеуніктің жымқырған қаражатын заңдастыру үшін қаладан сатып алған жерін туған әпкесінің атына рәсімдеп, ол жерге коммерциялық нысан тұрғызғаны белгілі болды. Нарықтағы құны 130 млн теңге шамасында тұратын ғимарат тәркіленіп алынды. Айта кетейік, бұл істе ымыраласа жұмыс істеген Айтбаев та бүгін сотталды. Судья оған 8 жылға бас бостандығынан айыру жазасын кесті. Десе де, сотталғандар үкіммен келіспейтін сияқты. Қорғаушылары апелляциялық шағым түсіретінін мәлімдеді.