Тергеу-жедел тобы жанжал ЖШС жұмысшылары мен Талапкер елді мекенінің жастары арасында болғанын анықтады
Ішкі істер министрлігі тергеу департаментінің басшысы Санжар Әділов 10 қарашада төбелес салдарынан қайтыс болған Жанболат Ағаділдің өліміне қатысты ақпарат берді.
«2020 жылдың 10 қарашасында Нұр-Сұлтан қаласы Көктал ықшамауданында төбелес болған. Төбелес салдарынан 17 жастағы Жанболат Ағаділ пышақ жарақатын алып, қайтыс болды. Тергеу-жедел тобы жанжал ЖШС жұмысшылары мен Талапкер елді мекенінің жастары арасында болғанын анықтады. Ақмола облысына қарасты Талапкер елді мекененінен 20 шақты жігіт Көктал ықшамауданындағы жұмысшылар тұратын орынға келген», - дейді Санжар Әділов.
ІІМ өкілінің айтуынша, жанжалдың соңы төбелеске ұласқан. Талапкерден келген жігіттердің қатарында Жанболат Ағаділ де болған. Ол пышақ жарақатын алып, жедел-жірдем келгенше оқиға орнында көз жұмған.
«Аталған фактіге қатысты ҚР Қылмыстық кодексінің 293-бабы 3-бөлігі (бұзақылық бабы) бойынша, 99-баптың 2-бөлігі (кісі өлтіру) қылмыстық тергеу жүргізіліп жатыр. Төбелеске қатысушылардың бәрі ұсталды. Негізгі күдіктілер де қамауға алынды. Төбелеске қатысқан үшеу, оның ішінде кісі өлтірді деген күдікпен біреуі Нұр-Сұлтан полиция бөлімінің уақытша ұстау изоляторына қамалды», - деп толықтырды ІІМ өкілі.
Санжар Әділовтің айтуынша, бұл іске қатысты жиналған материалдар бойынша күдіктілердің кінәсі дәлелденген.
«Төбелеске қатысқан күдіктілер, сондай-ақ кәмелетке толмаған адамды өлтірді деген күдіктінің аса ауыр қылмыс істегені толықтай әшкереленді», - деп түйіндеді сөзін.
Еске сала кетейік, төбелес кезінде жарақат алып, мерт болған Жанболат Ағаділ – 2020 жылдың 25 ақпанында уақытша қамау изоляторында қайтыс болған Дулат Ағаділдің ұлы.