Алматыда тұрақты түрде пәтер ұрлығымен айналысқан қылмыстық топтың мүшелері ұсталды

Алматылық полицейлер Бостандық ауданында арнайы жасақ сарбаздарының көмегімен бірнеше пәтер ұрлығына қатысы бар үш күдіктіні ұстады. Бұл туралы polisia.kz хабарлайды.

Ұсталғандардың үшеуі де Алматы облысының тұрғыны. Олардың екеуі бұрын мүліктік қылмыс жасағаны үшін сотталған.

«Күдіктілер осыдан бір күн бұрын Қабанбай батыр көшесінде орналасқан пәтерлердің біріне ұрлыққа түскеннен кейін ұсталды. Оңай ақшаға құныққан олар ақша мен құнды мүліктерді алып кеткен. Ұрланған заттар тәркіленді, күдіктілер оны сатып үлгермеген. Қазір олардың Алматы қаласының аумағында жасалған 11 қылмысқа қатысы бар екені анықталды. Біздің ақпаратымыз бойынша, оларды бірнеше пәтер ұрлығын жасағаны үшін Нұр-Сұлтан мен Шымкент қалаларындағы әріптестеріміз де іздестіріп жатыр», – деді Алматы қаласы Полиция департаменті бастығының орынбасары Берік Әбілбеков.