Түркістан облысында терезе торына басы қысылып қалған ер адамға көмек көрсетілді

Түркістан облысының полицейлері темір торға қысылып қалған ер адамды құтқарып алды, деп хабарлайды Polisia.kz.

Арыс АПБ кезекші бөліміне аудан орталығындағы көпқабатты үйлердің бірінің кіреберісіндегі терезе торына ер адамның басы қысылып қалғаны туралы хабарлама келіп түскен. 

Тәртіп сақшылары ер адамға көмек көрсету үшін темір торды кесіп, оны шығарып алды. Полицейлер зардап шегушіге су ішкізіп, алғашқы медициналық көмек көрсетті.

Анықталғандай, көппәтерлі үйдің тұрғыны Мақсат Нұрбасов пәтерден кіреберіске шығып, баспалдақпен төмен қарай түскен. Осы мезетте ер адамның қан қысымы көтеріледі. Содан соң құлап түсіп, азаматтың басы терезе торының арасына кіріп кеткен. Ол өзі әрекеттенгенімен, шыға алмаған.

Арыс қаласының тұрғыны Мақсат Нұрбасов патрульдік полиция қызметкері Ерлан Ишанов пен Қанат Сасаевқа уақытылы көмек көрсеткеніне және өмірін құтқарғаны үшін алғысын білдірді.

«Сол күні мен өзімді нашар сезіндім, бірден қан қысымым көтеріліп кетті. Баспалдақпен түсіп келе жатып, көз алдым қараңғылана бастады, содан соң құладым. Көршілерге рахмет, олар көмекке полиция шақырды. Көршілерім мен полиция қызметкерлері Ерлан мен Қанатқа алғысымды білдіргім келеді. Олар мені темір тордың құрсауынан шығарды. Содан соң ауруханаға бардым, дәрігерлер ешқандай асқынудың жоқ екенін айтты. Тәртіп сақшыларына көп рахмет»!, – деп Арыс ауданының тұрғыны полицейлерге ризашылығын жеткізді.