Шымкентте алып қашудың құрбаны болған бойжеткен терезеден секіріп кеткен

Шымкентте өзін алып қашқан жігітке көнбеген бойжеткен екінші қабаттан секіріп кеткен. Бұл туралы «Астана» телеарнасы хабарлады.

Куәгерлердің айтуынша, 22 жастағы қыз түрлі дене жарақатын алған. Бірақ бұған қатысты дәрігерлер ешқандай ақпарат бермеді.

Ал полиция алып қашу дерегін растамады. Олар жас қыздың абайсызда құлап кеткенін жазбаша хабарлады. 

«Хабарлама бойынша жедел-тергеу тобы ауруханаға жеткенде, бойжеткен Республика даңғылы, 45 үйде тұратын туысқандарында қонақта болып, өз абайсыздығынан терезеден құлап кеткенін, сондай-ақ бұл жайт бойынша ешкімге қояр арыз-шағымы жоқ екенін көрсеткен», - деді Шымкент қаласы Полиция департментінің өкілі А. Төребекқызы.