Қостанайда 3 жыл бұрын көз жұмған адамның мәйіті табылды
Мәйіт кәріз құбырында жатқан
Қостанайда кәрізден 2017 жылы өлген адамның мәйіті табылды, деп хабарлайды Azattyq Rýhy тілшісі полиция департаментінің баспасөз қызметіне сілтеме жасап.
«Ерлі-зайыптылар жағымсыз иісті сезіп, кəрізді тазартпақ болғанда, ол жерден адамның мәйітін тапқан. Бұл дерек ҚР ҚК 99-бабы 1-бөлігі («Кісі өлтіру») бойынша тіркелді», - деп жазылған хабарламада.
Тəртіп сақшылары із-түзсіз жоғалғандардың тізімін тексеріп, 2017 жылдың қарашасынан бері хабар-ошарсыз жоғалып кеткен қала тұрғынын анықтады. Табылған мəйіттегі киім қалдықтары жоғалған адамның сипаттамасына сәйкес келді. Полиция қызметкерлері ерлі-зайыптылардың үш жыл бұрын өрттен кейін үйді қалпына келтіру үшін жұмысшылар жалдағанын анықтады. Қазіргі уақытта олар қамауда. Тергеу амалдары жүргізіліп жатыр.
