Петропавлда таксиге ақша төлеуден бас тартқан жолаушы жүргізушіні сабап тастады

Петропавлда такси қызметін пайдаланып, ақы төлеуден бас тартқан жолаушы такси жүргізушісін ұрып тастады. Түрлі дене жарақатын алған жәбірленуші тәртіп сақшыларының көмегіне жүгінген. Бұл туралы СҚО Полиция департаментінің баспасөз қызметі хабарлайды.

Петропавл қалалық Полиция басқармасының Екінші полиция бөліміне дене жарақатына қатысты арызбен 46 жастағы таски жүргізушісі жүгінген. Айтуынша, жол ақысын төлеуден бас тартқан жолаушымен арада жанжал болған, нәтижесінде такси қызметін пайдаланушы азамат бетінен екі рет жұдырықпен ұрған.

Криминалдық полиция бөлімінің қызметкерлері күдіктіні анықтады. Ол жүргізуші барсеткасын тартып алмақ болғандықтан күш қолданғанын айтып ақталған. Аталған факт ҚР Қылмыстық кодексінің 107-бабы (денсаулыққа қасақана жеңіл зиян келтіру) бойынша сотқа дейінгі тергеп-тексерудің бірыңғай тізіліміне енгізілді.

«Такси жүргізушілері мен жолаушылар арасында жанжал болып тұрады. Көбіне дау мас күйде мінген жолаушылармен арада болады. Әдетте, жағдай сөзге келіп қалудан аспайды. Бірақ кейде ушығып кетеді. Кезф келген дау заңды түрде шешілуі тиіс екенін барлық азаматтардың есіне саламыз. Адам эмоцияға берілемін деп заң алдынан бір-ақ шығуы мүмкін», - дейді Петропавл қаласы ПБ бастығының міндетін атқарушы полиция подполковнигі Әлібек Ғабдуллин.

Жапа шегушінің дене жарақатының деңгейін дәрігер мамандар анықтайтын болады. Қоғамдық көлік қызметін пайдаланып, бірақ ақы төлеуден бас тартқан басбұзар жолаушы жүргізушінің денсаулығына келтірген зиян үшін заң алдында жауап бермек. Тәртіп сақшылары бұл такси жүргізушілері мен тұтынушылар арасында туындаған алғашқы дау емес екендігін атап өтті.

Эльмира Мәмбетқызы, СҚО