«ҚазАгро» холдингінің топ-менеджері уақытша қамауға алынды

Сыбайлас жемқорлыққа қарсы қызмет Ауыл шаруашылығы министрлігі «ҚазАгро» холдингінің «Аграрлық несие корпорациясы» АҚ басқарушы директоры – басқарма мүшесіне қатысты жемқорлық қылмысын жасады деген күдікпен сотқа дейінгі тергеуді бастады.

«Ол мемлекеттік функцияларды орындауға уәкілетті тұлғаға теңестірілген бола отырып, өз құзыретіне кірмейтін шешімдер қабылдаған. Ақтөбе облысындағы кепілдік мүлік - элеваторды сату/сатып алу келісім-шартын жасағаны үшін алдау және сенімді теріс пайдалану арқылы «Интер-Агро» және «ИнтерАгроТрейд» ЖШС құрылтайшысы мен басшысына тиесілі бұрын келісілген 200 мың АҚШ долларынан 20 миллион теңгені иемденіп кеткен», - делінген Сыбайлас жемқорлыққа қарсы қызмет хабарламасында. 

Күдікті ұсталып, Нұр-Сұлтан қаласы Полиция департаментінің уақытша ұстау изоляторына қамалды. Холдинг өкіліне қатысты түпкілікті шешімді оның кінәсінің деңгейін анықтау арқылы сот қабылдайтын болады.