Елордадағы «Алания» түнгі клубы тағы да карантин режимін бұзды

Өткен түні сағат 03:31-де елордағы «Алания» түнгі клубының қызмет көрсеткені, онда көңіл көтеруге келген меймандардың шулап жатқаны туралы полицияға шағым түскен. Шағым негізінде оқиға орнына полиция өкілдері барып, онда 70-ке жуық адамның көңіл көтеріп жатқанын анықтаған.

«Олардың ешқайсы санитарлық талапты орындамай, арақашықтықты сақтамай, медициналық маскасыз жүр. Олардың бәрі тыныштықты бұзғаны үшін әкімшілік жауапқа тартылды. Ал, түнгі клубқа келетін болсақ, бұл мекеме карантин режимін бұзғаны үшін бұған дейін де бірнеше рет жауапқа тартылған», - деп хабарлайды Нұр-Сұлтан қаласы Полиция департаментінің баспасөз қызметі.

Осы оқиғаға байланысты шешім қабылдау үшін жиналған құжаттардың барлығы Тауарлар мен қызметтердің сапасы мен қауіпсіздігін бақылау комитетінің жұқпалы ауруларды эпидемиологиялық қадағалау басқармасына берілген.