Көкшетауда балконда тұрып мылтық атқан ер адам жауапкершілікке тартылды

Көкшетауда балконда отырып шағала атқан ер адам жауапкершілікке тартылды. Ұйқысын бұзғаны үшін құстарды жазаламақ болған ол осындай қадамға барған, деп хабарлайды Azattyq Rýhy тілшісі Ақмола облысы Полиция департаментінің баспасөз қызметіне сілтеме жасап.

Полиция департаментінің мәліметінше, Көкшетау қаласының полиция бөлімінің қызметкерлері Instagram әлеуметтік желісінде ер адамның үй балконынан бірнеше мәрте оқ атқаны түсірілген бейнероликті анықтаған.  

«Әлеуметтік желілерде таралған бейнеролик бойынша полиция қызметкерлері дереу жедел іздестіру шараларын ұйымдастырды. Жүргізілген тексерістердің барысында Көкшетау қаласының балконда тұрып сыртқа оқ атқан 40 жастағы тұрғыны екені анықталды. Ол анасымен бірге тұрады екен. Мылтық осыдан он бес жыл бұрын қайтыс болған әкесінен қалған мұра болып шықты. Ер адам күндізгі сағат он екілер шамасында үйінің арт жағында орналасқан қоқыс контейнерлерінің үстінен ұшып бара жатқан шағалаларға бірнеше рет оқ атқан. Полицияға түсініктеме берген кезде даладағы құстардың шулаған дауысы ұйқы бермегендіктен, оларға оқ атуға мәжбүр болғанын айтқан», - дейді Ақмола облысы Полиция департаментінің баспасөз қызметінің жетекшісі Гүлнәр Пинчук.

Аталған факт бойынша ҚР қылмыстық кодексінің 436 бабының 1-бөлігі бойынша әкімшілік құқықбұзушылық жасағаны анықталып, көшеге мылтық атқан ер адамға 20 айлық есептік көрсеткіш мөлшерінде айыппұл салынды.

«Сондай-ақ полиция қызметкерлері ер адамнан КСРО кезінде шығарылған 4,5 мм калибрлі «ИЖ-38» маркалы мылтық пен 48 қорғасыннан жасалған оқ-дәрілерді тәркілеп алды», - деді полицияның баспасөз қызметінен.

Қазіргі уақытта аталған факт бойынша тергеу амалдары жалғасуда.

Абзал Алпысбайұлы, Ақмола облысы