Сарыағашта адам қаққан жүргізуші оқиға орнынан қашып кетті

Түркістан облысының полицейлері жол апатын жасап, оқиға орнынан қашып кеткен жүргізушіні ұстады, деп хабарлайды Polisia.kz.

Сарыағаш АПБ-нің кезекші бөліміне тұрғындардың бірі хабарласып, жол бойында көлік қаққан адамның жатқанын жеткізген. Ақпарат алған бетте тәжірибелі полицейлерден құралған жедел-тергеу тобы оқиға орнына жетті. Жарақат алған тұрғын жедел жәрдем көлігімен орталық аурухананың жансақтау бөліміне жеткізілді. Оқиға орнына келген полицейлер, Құркелес ауылының Ақниет – Көктерек тасжолы бойында белгіленбеген жолмен өтпекші болған тұрғынды, белгісіз «Hyundai Sonata» автокөлігі соғып, жол апатын жасағанын анықтады. Ал кінәлі жүргізуші жол-көлік оқиғасы орнынан қашып кеткен. Апатқа қатысы бар жасырынған жүргізушіні ұстау мақсатында Сарыағаш аудандық полиция бөлімі қызметкерлерімен жедел-іздестіру іс-шаралар кешені жүргізілді. Нәтижесінде, бес тәулік ішінде «Hyundai» маркалы көлік анықталып, полиция бөліміне жеткізілді. Жүргізуші өз кінәсін толық мойындады. Ол жергілікті тұрғын болып шықты. Автокөлік айыптұраққа қойылды.

«Аталған жайт Сарыағаш аудандық полиция бөлімінде ҚР ҚК-нің 345-1-бабымен (Алкогольдік, есірткілік және (немесе) уытқұмарлық масаң күйде көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзуы) тіркелді. Күдікті қолхатпен босатылды», - делінген ақпаратта.