Оралда мурал суретшісіне көмектесіп жүрген ерікті токқа түсіп көз жұмды

Тұрғын үй қабырғасына мурал салып жүрген суретшіге қол ұшын созған волонтер токқа түсіп қаза тапқан.  Самат Шайдоллаұлы бүгін жер қойнауына тапсырылды, деп хабарлайды Azattyq Rýhy тілшісі «Астана» телеарнасына сілтеме жасап.

Қайғылы оқиға қыркүйектің 1 күні түнгі сағат 11 шамасында болған. 31 жастағы Самат Шайдоллаұлы көпқабатты үйлердің бірінің қабырғасына мурал салып жатқан суретшіге көмектескен. Тоққа шатыр үстінде жүрген түсіп қалыпты. Оқыс оқиғадан кейін тұрғын үй қабырғасындағы сурет жұмысы тоқтатылды. Марқұм Орал қаласындағы «Uralsk Runners» (Юралск Раннерз) желаяқтар тобының мүшесі болыпты. Ол талай марафондар мен қайырымдылық шараларына қатысқан. 

«Жұмыс кезінде 1989 жылы туған азаматтың қолы жоғары кернеулі сымға тиіп кеткен. Ол алған дене жарақатынан оқиға орнында көз жұмды. Қазір осы оқыс оқиға бойынша Орал қалалық полиция басқармасы сотқа дейінгі тергеу амалдарын жүргізуде», - деді БҚО ПД баспасөз қызметінің өкілі Кәмшат Серікқызы.