БҚО тұрғындарына той туралы хабарлама үшін 20 мың теңгеден төленетін болады

Хабарлама үшін ақшалай сыйақыны 102 немесе 112 нөмірлеріне қоңырау шалу арқылы алуға болады, деп хабарлайды Azattyq Rýhy тілшісі «Мой город» порталына сілтеме жасап. Қоғамдық тәртіпті сақтауға қатысатын азаматтарды көтермелеу туралы мәселе облыстық комиссия отырысында шешілді.

«Банкеттер, үйлену тойлары, мерейтойлар, салтанатты, отбасылық, естелік, салттық және басқа да бұқаралық іс-шаралар, оның ішінде үйде өткізілетін іс-шаралар туралы расталған фактілер туралы хабарламалар үшін 20 мың теңге көлемінде ақшалай сыйақы төленеді», - деп түсіндірді БҚО әкімдігінің баспасөз қызметі.

Бұл іс жүзінде қалай көрінеді?

«Карантин кезінде жаппай іс-шараларды өткізу туралы сенімді ақпарат табылған немесе болған жағдайда бұл туралы 102 және 112 нөмірлерге хабарлау қажет. Оқиға орнына құрамында полиция және СЭС қызметкерлері (БҚО бойынша тауарлар мен қызметтердің сапасы мен қауіпсіздігін бақылау департаменті) бар мониторингтік топ барады. Құқық бұзушылық тіркелгеннен кейін саналы азаматқа тиісті ақша төленеді. Тиісті шешім комиссияның кезекті отырысында қабылданады», - деп түсіндірді БҚО әкімдігінде.