Атырауда қоршауды аттап өтпек болған мас адамның аяғына темір қадалар кіріп кетті

Оқиға 18 тамыз күні кешкі сағат 17:30 шамасында болған. 1974 жылы туған ер адам алған ауыр жарақаты салдарынан ауруханаға жеткізілген, деп хабарлады Атырау облыстық ТЖД баспасөз қызметі.

Спирттік ішімдік ішіп алған ер адам жолды қысқартпақ болса керек, үшкір қадалары бар темір қоршауға өрмелеп шыққан. Алайда, тепе-теңдікті сақтай алмай құлап кетіп, екі қада оның табанын тесіп өткен.

Оқиға орнына келген құтқарушылар ер адамды «тұзақтан» өз бетінше шығара алмай, темір кесетін құралмен қоршауды бұзып алды. Ауруханаға ол темір қадалармен бірге жеткізілген.