Қорғаныс министрлігі парашюті ашылмай қалған әскери қызметші туралы пікір білдірді
Жерге қолайсыз жағдайда қонған әскери қызметшінің жағдайы ауыр
5 тамызда Ақтау қаласында ұшу құрамы парашютпен секірген кезде әскери қызметшілердің бірінде парашют толық ашылмай қалған. Бұл туралы Қорғаныс министрлігінің баспасөз қызметі хабарлайды.
«Парашютші берілген командаларға жауап бермей, қосалқы парашютті пайдаланбау нәтижесінде, жерге қолайсыз жағдайда қатты келіп қонған. Зардап шеккенге алғашқы медициналық көмек көрсетіліп, әскери қызметші Ақтау қаласының медициналық мекемесіне жедел жеткізілді. 8 тамыз күні дәрігерлер хирургиялық операция жасады. Әскери қызметшінің жағдайы ауыр», - делінген ведомство хабарламасында.
Қорғаныс министрлігі парашютпен секіру қолайлы метеорологиялық жағдайда жауынгерлік даярлық жоспарына сәйкес орындалғанын айтады. Секіру алдында әскери қызметшілерге қауіпсіздік шараларын сақтау бойынша нұсқаулық өткізілген. Қазір оқиғаның себебін анықтау үшін қызметтік тергеу басталды.
