Семейде адамдар отырған моторлы қайық аударылып қалды

Семейде адамдар отырған қайық аударылып қалды, деп хабарлайды Azattyq Rýhy тілшісі облыстық ТЖД баспасөз қызметіне сілтеме жасап.

«1 тамызда жедел-құтқару бөлімшесінің қызметкерлеріне аударылған қайықтың ішіндегі адамды құтқаруын сұраған жастар хабарласқан. Жігіттер металдан жасалған моторлы қайықпен жүзіп жүріп, одан секіргенде, қайық аударылып қалған. Екі адам жүзіп шыққан, үшіншісі көрінбеген. Келген құтқарушылар жас жігіттің қайық аударылып кеткен жерден 150 м қашықтықта жағаға шыққанын анықтаған. Оған ешқандай көмек қажет болмаған. Жастар құтқару жилеттерін кигендіктен, қайғылы жағдай тіркелмеген», - деп жазылған хабарламада.