Батыс Қазақстанда ірі табиғи өртті әуеден және жерден сөндіріп жатыр
Өртті сөндіруге 80-ге жуық адам, екі тікұшақ және 10 техника жұмылдырылды
Батыс Қазақстан облысындағы Орал орман шаруашылығы аумағында шыққан ірі табиғи өртті сөндіру жұмыстары жалғасып жатыр. Қатты желге қарамастан, өрт сөндірушілер жалынмен жердегі техника мен авиацияның көмегімен күресіп жатыр, деп хабарлайды Azattyq Rýhy.
Өртті сөндіруге Төтенше жағдайлар министрлігінің, Экология және табиғи ресурстар министрлігіне қарасты орман шаруашылығының, жергілікті атқарушы органдардың, сондай-ақ ТЖМ-нің 20982 әскери бөлімінің 2-құтқару батальонының күштері мен құралдары жұмылдырылған.
Әуеден ТЖМ-нің «Қазавиақұтқару» АҚ мен Экология және табиғи ресурстар министрлігінің «Қазавиаорманқорғау» республикалық мемлекеттік кәсіпорнының тікұшақтары жұмыс істеуде.
Өртті сөндіруге барлығы 80-ге жуық адам, 10 бірлік жерүсті техникасы және екі тікұшақ тартылған. Авиация жалпы көлемі 68 тонна суды 46 рет төкті.
Өртті сөндіру жұмыстарын екпінді жел қиындатып отыр. Соған қарамастан бөлімшелер өртті оқшаулау және толық сөндіру жұмыстарын жалғастыруда.
Өртті жою жұмыстары әлі де жалғасып жатыр. Жағдай Қазақстан Төтенше жағдайлар министрлігінің бақылауында.
Көп оқылған
