Тексеру кезінде ҚР аумағында сатуға рұқсат етілмеген 670 бума дәрі-дәрмектің 22 түрі тәркіленді
20 шілдеде Қаржы мониторингі комитетінің Павлодар облысы бойынша Экономикалық тергеу департаменті қызметкерлері қаладағы дәріханалардың бірінен Қазақстан Республикасында тіркелмеген дәрілік заттарды сату фактісін анықтады.
Облыстық Тауарлар мен қызметтердің сапасы мен қауіпсіздігін бақылау департаментінің маманын қатыстыра отырып, қаладағы дәріхалардың бірінде тінту жүргізілген. Нәтижесінде, ҚР аумағында сатуға рұқсат етілмеген 670 бума дәрі-дәрмектің 22 түрі тәркіленді. Олар: «Ацетилсалициловая кислота медисобр», «Цефтриаксон», «Парацетомол", «Азитромицин», «Аскофен-П», «Антигрипин для детей», «Тетрациклин – Лент», «Спазмалган», «Эринит», «Никотиновая кислота», «Седальгин плюс», «Пенталгин», «Гентамицин», «Ацикловирм, «Викасол», «ТемпаLcin», «Спазган», «Кеторол экспресс», «Парацетомол суспензия», «Аналгин», «Андинал» және «Мукалтин».
Кәсіпкерден тәркіленген дәрі-дәрмектер ҚР үшін дайындалмаған және ҚР дәрілік заттар, медициналық мақсаттағы бұйымдар мен медициналық техниканың мемлекеттік тізіліміне енгізілмеген. Сонымен қатар, «Дәрілік заттарды және медициналық мақсаттағы бұйымдарды Қазақстан Республикасының аумағына әкелу және әкету ережелерін» бұза отырып, яғни дәрілік заттар мен медициналық мақсаттағы бұйымдарды ұлттық сараптау орталығының қауіпсіздік және сапа туралы сертификатынсыз ел аумағына әкелінген.
Қазір бұл жағдайға қатысты сотқа дейінгі тергеу жүргізілуде.
Бұдан бөлек, шілде айынан бастап Павлодар облысы бойынша дәріханалардың көтеріңкі бағамен дәрілік препараттарды сатқаны жайлы 8 фактісі анықталды. Қаладағы үш дәріхана иесі мен қызметкерлері ҚР ӘҚБК 426-бабы бойынша 97 230 теңгеден 180 570 теңгеге дейін айыппұл түрінде әкімшілік жауапкершілікке тартылды.