Алматы облысында 4-5 сынып оқушылары дүкенге ұрлыққа түскен

Алматы облысында кішкентай балалар ұялы телефон жабдықтарын сататын дүкенге ұрлыққа түскен деп хабарлайды Polisia.kz. Полиция оларды бейнебақылау камерасындағы жазба арқылы ұстады.

Оқиға Қаратал ауданындағы Үштөбе базарында түнгі уақытта болған. Бутик иесінің айтуынша, ұрылар пластик терезені сығу арқылы ашып, дүкен ішіне кірген. Олар өзімен бірге ұялы телефон аксессуарларын алып кетіпті.

Полицейлер бейнебақылау камерасындағы жазбаны көргенде жағаларын ұстағанын айтады. Ұрлыққа түскен екеу – кішкентай балалар. Жедел іздеу барысында олардың жергілікті мектептің 4 және 5-ші сынып оқушылары екені анықталды.

«Ата-аналарының қатысуымен болған әңгімеден кейін олар сымсыз құлаққаптар, сабвуфер, қуаттайтын құрылғыларды және т.б. заттарды ұрлағанын мойындады. Белгілі болғандай, ата-аналары ұялы телефон сатып алып береміз деген уәде бергеннен кейін, оларға қажетті аксессуарлар алу мақсатында қылмысқа барған. Енді жасөспірімдердің ата-аналары кәмелетке толмаған балаларды тәрбиелеу жөніндегі міндеттерін орындамағаны үшін, олардың қылмыстық құқық бұзушылық белгілері бар қасақана әрекет жасағаны үшін, сондай-ақ кәмелетке толмағандардың түнгі уақытта үйінен тыс жерде заңды өкілдерінің еріп жүруінсіз жүргені үшін жазаға тартылады», - дейді Алматы облысы Қаратал ауданының ПБ ювеналды полиция инспекторы Жеңіс Иманов.