Алматыда карантин режимін бұзған лаундж-бар қожайыны енді 639 мың теңге айыппұл төлейді

Алматылық полицейлер рейд барысында түнгі уақытта жұмыс істеген лаундж-барды анықтады деп хабарлайды Polisia.kz. Енді көңіл көтеру орталығының қожайыны 639 мың теңге айыппұл төлеуі тиіс.

Айта кетейік, елімізде енгізілген карантин режимі кезінде шағын және орта бизнес нысандары тек рұқсат етілген уақытта, яғни күндіз ғана жұмыс істеуі тиіс. Осы талаптың сақталуын қадағалау мақсатында Алматы полицейлері күн сайын рейдтік шараларды жүргізіп келеді.

«Алматы қаласы аумағында қолданылған қатаң шектеу шараларына қарамастан, лаундж-бардың басшылығы Алматы қаласының бас мемлекеттік санитарлық дәрігерінің 2020 жылғы 3 шілдедегі бұйрығының талаптарына қайшы келді. Шағын кәсіпкерлік субъектісіне қатысты ҚР ӘҚбК-нің 425 бабы – халықтың санитарлық-эпидемиологиялық салауаттылығы саласындағы заңнама талаптарын, сондай-ақ, гигиеналық нормативтерді бұзу бойынша әкімшілік хаттама жасалды. Бұл құқық бұзушылық үшін мекеме иесі енді 230 АЕК – 638 940 теңге көлемінде айыппұл төлеуі керек», – деді, Алмалы аудандық Полиция басқармасының бастығы Есен Ысқақов.