Қазақстан Үкіметінде ЖИ-министр пайда бола ма
Жасанды интеллектіні министр қызметіне тағайындауға қолданыстағы заң кедергі дейді шенеунік
Қазақстанда жасанды интеллектіні үкіметтегі қандай да бір лауазымға тағайындау әзірге жоспарда жоқ. Бұл туралы жасанды интеллект және цифрлық даму вице-министрі Досжан Мұсалиев мәлімдеді, деп хабарлайды Azattyq Rýhy.
Оның айтуынша, қолданыстағы заңнама ЖИ-ді министрлер кабинетінің мүшесі етуге мүмкіндік бермейді.
«Өздеріңіз білесіздер, Қазақстан әлемде бірінші болып жасанды интеллект министрлігін құрды. Бірақ жасанды интеллектіні министр немесе вице-министр етіп тағайындауға заңнамамыз әзірге мүмкіндік бермейді», - деді Мұсалиев Үкіметте өткен баспасөз мәслихатында.
Вице-министр заң бойынша елімізде жеке тұлға ғана мемлекеттік қызметкер бола алатынын атап өтті.
«Сол себепті әзірге мұндай жоспар жоқ», - деп қысқа қайырды ол.
Жуырда Албанияда әлемдегі алғашқы ЖИ-министр тағайындалғаны туралы ақпарат тараған болатын.
