Лотереядан бір бөлмелі пәтер ұтып алған вице-министр қызметінен босатылды

Ғабидолла Оспанқұлов ҚР Ақпарат және қоғамдық даму вице-министрі қызметінен босатылды, деп хабарлайды Azattyq Rýhy тілшісі primeminister.kz-ке сілтеме жасап.

«Қазақстан Республикасы Үкіметінің Қаулысымен Ғабидулла Абдуллаұлы Оспанқұлов берген өтінішіне сәйкес ҚР ақпарат және қоғамдық даму вице-министрі лауазымынан босатылды», - деп жазылған ақпаратта.

Ғабидолла Оспанқұлов 1981 жылы Оңтүстік Қазақстан облысында дүниеге келген. Қазақ гуманитарлық-заң университетін, Қазақстан-Ресей университетін, «Болашақ» бағдарламасы бойынша Бирмингем университетін (Ұлыбритания) тәмамдаған. Түрлі жылдары ҚР Парламентінде, Президент Әкімшілігінде, Екібастұз қаласының әкімдігінде, ҚР Білім және ғылым министрлігінде жұмыс істеген. 

2013 жылдан 2017 жыл аралығында Жастар ісі комитетін басқарды, ҚР БҒМ Жастар саясаты департаментінің директоры болды, ҚР Дін істері және азаматтық қоғам министрлігінде жұмыс істеді. 2017 жылдың қазан айынан 2019 жылдың тамыз айы аралығында Батыс Қазақстан облысы әкімінің орынбасары қызметінде болды. 2019 жылдың тамыз айынан желтоқсан айы аралығында — Nur Otan партиясының хатшысы. 2019 жылғы желтоқсаннан бастап қазіргі таңға дейін ҚР Ақпарат және қоғамдық даму вице-министрі қызметін атқарды.

Естеріңізге сала кетейік, ақпан айының 18-і күні еліміздегі ірі құрылыс компанияларының бірі пәтер сатып алған клиенттерінің арасында ұтыс ойнатқан болатын. Сол кезде бас жүлде үшін елордадан бір бөлмелі пәтер ойнатылып, ол ұтысты Ақпарат вице-министрі Ғабидолла Оспанқұлов ұтып алған еді.