Қазақстанда таңбаланатын тауарлар тізімі кеңейеді

Сауда және интеграция министрлігі 2027 жылға дейін таңбаланатын тауарлар реестрін кеңейтеді. Бұл туралы ведомство басшысы Арман Шаққалиев мәлімдеді, деп хабарлайды Azattyq Rýhy.

Министрдің айтуынша, жасырын экономиканың секторы орта және шағын бизнестің дамуын тежейді, бәсекелестікті төмендетеді және бюджет кірісін азайтады.

«Осыған байланысты таңбаланатын тауарлар тізбесін кеңейту шаралары қабылданып жатыр. Жаңа тауар топтарына қатысты таңбалауды енгізу мерзімдері осы жылдан 2027 жылға дейін белгіленді», - деді Шаққалиев Үкімет отырысында.

Дәлірек айтқанда, 2025 жылдың соңына дейін мотор майларын, сыра қайнату өнімдерін 2026 жылғы ақпаннан, жеңіл өнеркәсіп тауарларын 2026 жылғы наурыздан, зергерлік бұйымдарды 2026 жылғы желтоқсаннан және биологиялық белсенді қоспаларды 2027 жылдан бастап таңбалау жоспарланып отыр.