Үкімет су тасқынын болжау үшін резервтен 576 млн теңге бөлді

Үкімет су тасқынының алдын алу үшін өзен-сулардағы су деңгейін анықтайтын батиметриялық зерттеулерге 576 млн теңге бөлді, деп хабарлайды Azattyq Rýhy.

Қаулыға премьер-министр Олжас Бектенов қол қойған. Ақшаны су ресурстары және ирригация министрлігі алады.

«Қаржыландырудың негізгі бөлігі жабдықтар мен техникалық жарақтарды сатып алуға, сондай-ақ зерттеулерге бағытталады. Атап айтқанда, осы ақшаны «Қазсушар» компаниясының «Су метрология» филиалына беріп, еліміздің солтүстік, батыс және орталық өңірлердегі су тасқыны қаупі бар учаскелеріне батиметриялық зерттеу жүргізу көзделіп отыр», - деп хабарлайды үкімет. 

Өзен-сулар биыл да, 2025 жылы да зерттелуі керек. Зерттеудің деректері цифрлық даму, инновациялар және аэроғарыш өнеркәсібі министрлігі мен «Қазақстан Ғарыш Сапары» компаниясына беріледі.