Қазақстанда жаңа мемлекеттік компанияларды құруға тыйым салынды
Мораторий алдағы екі жыл бойы күшінде болады
Қазақстан үкіметі жаңа мемлекеттік компанияларды құруға 2027 жылға дейін мораторий жариялады, деп хабарлайды Azattyq Rýhy.
Премьер-министр Олжас Бектенов квазимемлекеттік сектор субъектілерін құруға мораторий енгізу туралы қаулыға қол қойды.
«2026 жылғы 31 желтоқсанға дейін квазимемлекеттік сектор субъектілерін құруға мораторий енгізілсін. Осы қаулы қол қойылған күнінен бастап қолданысқа енгізіледі», - делінген қаулы мәтінінде.
Тек екі жағдайда ғана мемлекеттік кәсіпорын ашуға рұқсат етіледі:
- «Заңсыз иемденілген активтерді мемлекетке қайтару туралы» заңның орындалуын қамтамасыз ету үшін;
- ҚР Президентінің тікелей тапсырмалары бойынша айрықша жағдайларда.
Мораторий мемлекет басшысының мамыр айындағы «Экономиканы ырықтандыру жөніндегі шаралар туралы» жарлығын іске асыру мақсатында енгізілген.
Квазимемлекеттік сектор субъектілеріне мемлекет құрған, қатысқан немесе акционер болған мемлекеттік кәсіпорындар, жауапкершілігі шектеулі серіктестер, акционерлік қоғамдар, ұлттық компаниялар мен ұлттық холдингтер кіреді.
