Қазақстанда мемлекеттік қызметшілерге қатысты үлкен өзгеріс болғалы жатыр

Қазақстанда мемлекеттік қызметшілердің жеке ісіне туыстарының ЖСН-нін, бұрынғы жұмыс орнының бизнес-сәйкестендіру нөмірі мен қазақ тілін меңгеру деңгейі туралы деректерді қосу жоспарланып отыр. Тиісті бұйрық жобасы «Ашық НҚА» порталында жарияланған, деп хабарлайды Azattyq Rýhy.

Мемлекеттік қызмет істері агенттігі «Мемлекеттік қызметті өткерудің кейбір мәселелері туралы» бұйрыққа өзгерістер мен толықтырулар енгізу туралы бұйрық жобасын әзірледі.

Құжатқа сәйкес,  мемлекеттік қызметшінің жеке ісін жүргізуге қажетті құжаттардың тізбесі бірнеше жаңа деректермен толығады.

Дәлірек айтқанда, мемлекеттік қызметшілердің жеке ісіне:

• ведомстволық наградалармен наградтау туралы актілерден үзінді көшірмелер (бар болған жағдайда);
• қызметкердің бұрынғы жұмыс орнының бизнес-сәйкестендіру нөмірі туралы деректер;
• туыстарының жеке сәйкестендіру нөмірлері;
• жеке істі қалыптастыру немесе жаңарту сәтінде жарамды Qazaq resmi test/Qaztest және (немесе) шет тілін меңгеру деңгейі  туралы сертификаттар (бар болған жағдайда);
• кәсіби қызметпен байланысты жеке жетістіктер туралы деректер;
• мемлекеттік қызметшінің ғылым, мәдениет, өнер және спорт саласындағы әлеуметтік-қоғамдық қызметі және қабілеттері туралы деректер енгізіледі.

Бұл мәліметтердің бәрі тек қана «Е-қызмет» ақпараттық жүйесінде сақталады. Қағаз түрінде болмайды.

«Е-қызмет» ақпараттық жүйесінде мемлекеттік қызметшінің жеке ісін сапалы жүргізуді қамтамасыз ету заңнамаға сәйкес мемлекеттік органның аппарат басшысына, ал аппарат басшысы лауазымы жоқ мемлекеттік органдарда – мемлекеттік лауазымға тағайындау құқығы бар адамға жүктеледі.

Бұйрық жобасы 28 маусымға дейін қоғам талқысына шығарылды.