Қордайдағы жанжалға қатысты 25 қылмыстық іс қозғалды - ІІМ

Бұл іске белгілі қылмыс әлемінің серкесі «Серік-голованың» қатысы бар ма?

Бүгін Үкімет отырысына келген Ішкі істер министрлігі тергеу департаментінің директоры Санжар Әділов Қордай ауданында болған жағдайға қатысты пікір білдірді.

«Жамбыл облысы полиция департаменті территориалдық бөлімшелері 25-тен астам қылмыстық іс қозғады. Олар - жаппай тәртіпсіздік, жаппай тәртіпсіздікті ұйымдастыру және оған қатысу, шақыру баптары бойынша қозғалды. 6-дан аса іс бұзақылық бабы бойынша, 3 қылмыстық іс өзгенің дүниесін бүлдіру бойынша, 10 іс кісі өлтіру, 2 іс кісі өлтіруге оқталу фактісі бойынша жүріп жатыр. Қазір құқық органдары сотқа дейінгі тергеуді жүргізуде. Қылмыстық кодекстің 201 бабына сәйкес, тергеу туралы басқа мәліметтерді жариялауға, ұсталғандардың санын айтуға болмайды. Бірқатар күдікті ұсталғанын растаймын. Оларды қамау туралы өтінішхатты прокуратура органдары қолдады. Қазір сот санкциясымен бірқатар азамат тұтқындалды», - деді ол.

БАҚ өкілдері Санжар Әділовтен төбелестен кейін ұсталып, қайта босатылған 47 адам туралы сұрады.

«Расында да құжатсыз жүрген адамдардың кім екенін анықтау үшін ұстап, қылмыстық есепке тіркелді. Оларды жедел тексеріп, аталған іске қатысы болмағаннан кейін босаттық», - деді ол.

Санжар Әділов бұл іске Серік Жаманаевтың (қылмыстық лақапаты - «Серік-голова») қатысы бар деген әңгімеге қатысты да пікір білдірді.