Жастар кеңесі бос әңгіме айтылатын алаңға айналмауы тиіс – Дариға Назарбаева
Бүгін Парламент Сенаты жанындағы Жастар кеңесінің алғашқы отырысы өтті
Жиынды ашқан Сенат төрағасы Дариға Назарбаева жастар мен жастар саясаты әрдайым басты назарда екенін, сондықтан Жастар кеңесі бос әңгіме мен жақсы сөздер ғана айтылатын орынға айналмай, болашақ үшін жұмыс істейтін маңызды алаң болатынына сенім білдірді.
«Қазақстандағы әрбір бесінші азамат - 14-29 аралығындағы жастар. Еліміздің дамуы мен өркендеуінің негізгі қозғаушы күші де – осы жастар. Сол үшін олар заманауи талаптарға сай кәсіби білім алып, ел игілігі үшін қызмет етуге дайын болу керек», - деді Сенат төрағасы.
Дариға Назарбаева Жастар кеңесінің құрамына кімдер кіретінін айтып өтті.
«Жастар кеңесі Сенаттың консультативтік-кеңесші органы және жастар саясаты саласындағы заңнаманы жетілдіру мәселелерін қарастырады. Кеңесті құру туралы шешім Сенат бюросының бірауыздан қолдауымен қабылданды, кеңес туралы ереже және оның негізгі жұмыс жоспары бекітілді. Оның құрамына Парламент депутаттары, облыстық мәслихат депутаттары, мемлекеттік қызметкерлер, үкіметтік емес жастар ұйымдарының, қоғамдық бірлестіктердің өкілдері кірді», - деді Сенат спикері.
Дариға Назарбаева жастардың мұң-мұқтажын шешуге мемлекеттен қаржы бөлініп, түрлі бағдарламалар қабылданып жатқанын айтты. Алайда, соған қарамастан жастар мәселесі әлі де өзекті екенін еске салды.
«Ауылдық жерлерден қалаларға келген жастардың әлеуметтік бейімделу мәселесі, жұмыссыздығы өткір мәселе күйінде қалып отыр. Қазір «нетворкинг» ұғымы жастарға өте жақын. Осы Жастар кеңесі сіздермен ашық пікір алмасып, байланыс орнататын, тың идеяларды бірге талқылайтын алаң болады деп сенемін», - деді Дариға Назарбаева.
Әсел Тұмашқызы, Нұр-Сұлтан
