Қазақстанда атом станциясын салу қажет – Тоқаев

Мемлекет басшысы Қасым-Жомарт Тоқаев онлайн режимде өткен Шығыс экономикалық форумда сөз сөйлеп, Қазақстанда атом электр станциясын салу қажет деген пікір білдірді, деп хабарлайды Azattyq Rýhy тілшісі.

Тоқаев форумдағы сөзінде Қазақстан халқына жолдауында Үкіметтің алдына елде атом энергетикасын құру мүмкіндігін жан-жақты зерделеу міндеті қойылғанына тоқталды.

 «Мен бұл мәселені егжей-тегжейлі қарастыратын кез келді деп санаймын, өйткені Қазақстанға атом станциясы қажет», - деді Тоқаев.

Еске сала кетейік, 2019 жылдың сәуірінде Ресей президенті Владимир Путин Қазақстанда атом электр станциясын салуды ұсынды. 2019 жылғы маусымда Қасым-Жомарт Тоқаев осы мәселе бойынша халықпен талқылау жүргізуге уәде берді.

«Атом электр станциясын салу әлі жоспарланбаған. Қажет болса, біз бұл мәселені халықпен талқылаймыз. Қажет болса, референдум өткіземіз», - деген еді Тоқаев.

2021 жылғы мамырда Президент Қазақстандағы атом энергетикасын салу әлі ерте және қате екенін мәлімдеді.

«Бүкіл дамыған әлем атом энергиясына сүйенеді. Фобия мұнда орынсыз. Бірақ азаматтар арасында тұрақты түсіндіру жұмыстарын жүргізу керек. Біз атом станцияларын салуға асықпаймыз, бірақ бұл істе кешікпеуіміз де керек», - деді Президент.

Кейінірек Энергетика министрі Қазақстанда атом электр станциясын салу жоспарлары туралы егжей-тегжейлі айтып берді.

«Шешім әлі қабылданған жоқ. Президент Қасым-Жомарт Тоқаев бізге жылдамдатудың қажеті жоқ екенін, бірақ артта қалуға болмайтынын айтты. Сондықтан біз ықтимал қауіптерді жан-жақты қарастыруымыз керек. Бұдан әрі қоғамдық пікірді ескере отырып, шешім қабылданатын болады. Бүгінгі таңда ешқандай шешім жоқ», - деді министр.