Елімізде әлі күнге апаттық жағдайдағы 365 мектеп бар

Бүгінде еліміздегі 231 ауылда медициналық нысандар жоқ. Ұлттық экономика министрлігі жүргізген талдауға сүйенсек, 2 мыңнан аса аудандық және ауылдық ауруханаларға күрделі жөндеу жұмыстарын жүргізу қажет. Бұл туралы депутат Мұрат Бақтиярұлы Сенаттың кезекті отырысында баяндады.

Мұрат Бақтиярұлы келесі жылы әлеуметтік салаларға бюджеттен 21 трлн 389 млрд теңге бөлінетінін ескере келе, бұл салада ақсап тұрған мәселелерге тоқталды. Айтуынша, білім беру жүйесініне қатысты кейбір қордаланған мәселелер әлі күнге дейін шешімін таппай келеді екен.

«Білім беру саласына 2021 жылға 1,3 трлн теңге қарастырылған. Бұл осы жылмен салыстырғанда 458 млрд теңгеге артық. Алайда елімізде әлі күнге дейін 365 апаттық, 156 үш ауысымдық мектептер бар. Бұл орта білім беру жүйесінде 168 мың оқушы орны жетіспейді деген сөз. 2025 жылға қарай еліміздегі оқушылар саны 500 мыңға көбейеді деген болжам бар. Алдағы 3 жылдың бюджетінде елімізде 233 мектеп салу жоспарланған. Әлі де болса кәсіпкерлер бұл салаға келуге құлықсыз. Өйткені мектеп салатын жер алу өте қымбат тұрады», - деді сенатор.

Келер жылдан бастап мұғалімдердің жалақысы жыл сайын 25 пайызға өсетіні белгілі болды. Жалпы, алдағы 3 жыл ішінде білім беру саласына республикалық бюджеттен 5,1 трлн теңге бөлінеді. Сондай-ақ, 2021 жылы медбикелердің жалақысы 20 пайызға, 2022 және 2023 жылдары 10 пайызға артатын болады. Бұл туралы Сенат спикері Мәулен Әшімбаев айтты.

«2021 жылы бюджет шығындарының 50 пайыздан астамы әлеуметтік салаға бағытталады. Президент тапсырмасымен экономикадағы қиындықтарға қарамастан, бюджетте барлық әлеуметтік міндеттерді орындауға керекті қаржы қарастырылған. Еліміз үшін аса маңызды инфрақұрылымды дамыту, орталық және солтүстік өңірлерді газдандыру, ауыз сумен қамтамасыз ету мәселелері де қамтылады», - деді Сенат төрағасы.

Аталған қаражат әлеуметтік төлемдерді индексациялауға, мұғалімдер мен дәрігерлердің жалақыларын көбейтуге және халыққа медициналық қызмет көрсетуге жұмсалмақ.

Әсел Оршыбекова, Нұр-Сұлтан