Тоқаев 20 жыл бұрын қол қойылған Назарбаевтың Жарлығына өзгеріс енгізді

Қазақстан Президенті Қасым-Жомарт Тоқаев Қазақстан Республикасының Тұңғыш Президенті Нұрсұлтан Назарбаевтың 2000 жылғы 3 сәуірде қол қойған мәдениет саласында мемлекеттік стипендия тағайындау туралы Жарлығына өзгеріс енгізді. Бұл туралы Ақорданың сайтында 7 қыркүйек, дүйсенбіде жарияланған қаулыда айтылған, деп хабарлайды Azattyq Rýhy тілшісі.

«Қазақстан Республикасының Тұңғыш Президенті - Елбасының мәдениет саласындағы мемлекеттік стипендиясын тағайындау туралы» Қазақстан Республикасы Президентінің 2000 жылғы 3 сәуірдегі № 369 Жарлығына өзгеріс енгізу туралы» 

ҚАУЛЫ ЕТЕМІН:

1. «Қазақстан Республикасы Тұңғыш Президентінің - Елбасының мәдениет саласындағы мемлекеттік стипендиясын тағайындау туралы» Қазақстан Республикасы Президентінің 2000 жылғы 3 сәуірдегі № 369 Жарлығына (Қазақстан Республикасының ПҮАЖ-ы, 2000 ж., № 18, 185-құжат) мынадай өзгеріс енгізілсін:

1-тармақ келесі редакцияда жазылсын:

«1. Қазақстан Республикасының Тұңғыш Президенті - Елбасының мәдениет саласындағы жыл сайынғы 75 мемлекеттік стипендиясы айына 55 еселенген айлық есептік көрсеткіш мөлшерінде тағайындалсын».

«Осы Жарлық қол қойылған күнінен бастап қолданысқа енгізіледі», - делінген Мемлекет басшысының баспасөз қызметінің хабарламасында.

Айта кетейік, Елбасының 2000 жылғы Жарлығына сәйкес, жоғарыда аталған стипендияның мөлшері 20 еселенген айлық есептік көрсеткішті құрады.

Қазақстан Республикасының Президенті Қ. Тоқаев 

Нұр-Сұлтан, Ақорда, 2020 жылғы 7 қыркүйек 

№ 404