Жыл соңына дейін Қазақстан азаматтарының офшордағы шоттарына талдау жасалады
Өзге елде тұратын Қазақстан резиденттерінің де есепшоттары тексеріледі
Көлеңкелі экономикаға қарсы тұру шаралары аясында жыл соңына дейін Экономикалық ынтымақтастық және даму ұйымына мүше елдердің салық органдары жеке және заңды тұлғалардың есепшоттары туралы ақпаратпен алмасады. Премьер-министрдің бірінші орынбасары Әлихан Смайлов Мемлекет басшысы Қасым-Жомарт Тоқаевтың 1 қыркүйекте жасаған жолдауындағы міндеттерді орындауға бағытталған шаралар туралы айта келе, осылай мәлім етті.
Айта кетейік, Қасым-Жомарт Тоқаев халыққа арнаған жолдауында шетелдегі офшорлық шоттарды анықтауды, шетелде шоты бар мемқызметшілерді анықтауды, қос азаматтығы бар адамдарды квазимемлекеттік сектордағы жұмысы мен мемлекеттік жұмысынан босатуды тапсырған болатын.
«Президенттің айтқан тапсырмасын орындау үшін көлеңкелі экономикаға қарсы тұру жөніндегі жоспарды қайта жандандырамыз. Офшорға ақша аударуға қатысты заңнаманы жетілдіреміз. Жыл соңына дейін Экономикалық ынтымақтастық және даму ұйымындағы (қазір бұл ұйымға 37 мемлекет қосылған – авт.) елдердің салық органдары жеке және заңды тұлғалардың есепшоттары туралы алғаш рет ақпарат алмасады деген жоспар бар. Тиісінше, қолға түскен мәліметтердің негізінде біздің елдің резиденттеріне қатысты талдау жасаймыз», - деп түсіндірді Әлихан Смайлов.
Сондай-ақ бірінші вице-премьер көлеңкелі экономиканы тоқтату үшін салық және кедендік тексеру жұмыстарының бәрін цифрландыруға бағытталған жұмыстар жалғаса беретәнін хабарлады.
Кенжекей Тоқтамұрат, Нұр-Сұлтан
