Алексей Цой КВИ-дің ықтимал екінші толқынына қарсы Қазақстанның дайындығын сөз етті
Ведомствоаралық комиссия жұқпалы ауруларға арналған 13 жаңа аурухана салу туралы шешім қабылдады
Денсаулық сақтау министрі Алексей Цой коронавирус пандемиясы әлі аяқталмағанын, күзде тұмау мен ЖРВИ ауруларының маусымында коронавирустың өршуін, яғни жаңа толқынның басталуы мүмкін екенін тағы да ескертті. Сондай-ақ ведомство басшысы мұндай қауіпке Қазақстанның денсаулық сақтау жүйесі қалай әзірленіп жатқанын айтты.
«Қазақстанда қазан айында 13 модульдік инфекциялық стационар салу жоспарлануда. Еліміздің дәріханаларына 10 млн-нан астам дәрі-дәрмек жеткізілді. Бірыңғай дистрибьютор республиканың медициналық ұйымдарын айлық дәрі-дәрмек қорымен қамтамасыз етіп, 30 қыркүйекке дейін 24 млрд теңгеге қосымша екі айлық қор құрады. «СҚ-Фармация» негізінде республикалық тұрақтандыру қоры, сондай-ақ 11 өңірлік тұрақтандыру қоры құрылды», - деп жазды ол әлеуметтік желіде.
Министрдің хабарлауынша, ауруханаларды толық жарақтандыру үшін қосымша 2 578 ӨЖЖ аппараты, оның ішінде 1500 отандық тауар өндірушілерден, 1078 жергілікті бюджет, демеушілік көмек және Дүниежүзілік банк қаражаты есебінен сатып алынады.
«23 890 төсек-орын оттегімен қамтамасыз етіледі, оның ішінде 13 153-і оттегі концентраторлары арқылы қамтамасыз етіледі. 2020 жылдың қазанына дейін еліміздің барлық аудандық ауруханаларын сандық рентген аппараттарымен 100% қамтамасыз ету жоспарлануда. Ведомствоаралық комиссия Нұр-Сұлтан, Алматы және Шымкент қалаларындағы жұқпалы аурулар ауруханаларына ұқсас 2,7 мың төсек-орны бар жаңа 13 аурухана салу туралы шешім қабылдады», - деп жазды министр.
