Жалдамалы жұмысшылар үшін жұмыс беруші өтініш береді – Еңбек министрі 42 500 тг жайлы

Еңбек және халықты әлеуметтік қорғау министрі Біржан Нұрымбетов шілде айына жасалатын төлем үшін кім қалай өтініш беретінін айтып берді. Осы жолғы төлем алу үшін өтініш беру ережесінде бірқатар өзгеріс бар.

Нұрымбетов хабарлағандай, ең басты өзгеріс – енді жалдамалы жұмысшылар үшін жұмыс беруші өтініш береді, ал, оның өтінішін жедел штаб растайды.

«Біріншіден, жалдамалы қызметкерлерге қатысты өзгеріске тоқталайын. Төтенше жағдай кезіндегімен салыстырғанда, қазіргі карантиндік шектеулер кезінде біраз мекеме жұмысын істеп жатыр. Құрылыс, өндіріс салалары, тіпті қызмет көрсету, сауда-саттық саласында да шектеу болғанымен, жұмысы жүріп жатыр», - деп тоқталды.

Екіншіден, әр өңірдің бас санитар дәрігерінің қаулысымен сол облысқа қатысты ғана шектеу енгізіліп жатыр. Үшіншіден, 1 сәуірден бастап біраз мекеме жұмысшылары міндетті зейнетақы жарналарын немесе әлеуметтік жарналарын төлеуден босатылды. Сондықтан, сол жарналар арқылы қадағалау мүмкіндіктері шектеліп отыр. 

«Жалдамалы жұмысшыларға қатысты өзгеріс – біз жұмысшылар үшін зейнетақы жарнасының, әлеуметтік жарнасының болуы міндетті деген талап қоймаймыз. Өткен жолы кемінде он екі айда бір төлем болуы керек деген едік. Енді ондай болмайды. Екіншіден, алдыңғы (ТЖ кезінде – авт.) 42 500 теңге төлемнің тәжірибесін ескере келе, жалдамалы жұмысшылар үшін өтінішті тек оның жұмыс берушісі жібереді. Оны ақысыз демалысқа шыққанын растап, өз жұмысшыларының атынан өтініш бере алады. Жұмыс берушілер осындай өтініш жасауы үшін өтініш қабылдайтын порталдарда  ыңғайлы сервис жасаймыз», - деді Нұрымбетов.

Еңбек министрі хабарлағандай, жұмысшылар басшысы ол өтінішті берген-бермегенін, мемлекет оны мақұлдап-мақұлдамағанын өтініш статусын жеке сәйкестендіру нөмірі арқылы қарап, тексере алады. 

«Ең бастысы, жұмыс берушінің өтініші порталға келгенде, карантин кезінде оның жұмысы тоқтады ма, тоқтамады ма, оны әр ауданда құрылған жедел штабымыз тексереді. Әр ауданда құрылған штабымыз порталда мемлекеттік органдар мен «Атамекен» кәсіпкерлер палатасы ұсынған ақпарат негізінде, порталға кіріп, «Иә, біздің ауданда осы жұмыс орны тоқтады» немесе «Жоқ, бұл жұмыс орны тоқтаған жоқ» деп белгі қойып кетіп отырады. Басқа талап болмайды», - деп хабарлады Нұрымбетов.

Еңбек министрі порталдың барлығы осы жұма күні іске қосылатынын ескере келе, жұмыс берушілерге қызметкерлерінің ЖСН, банктегі шоты сияқты мәліметтерін жинай беруді ұсынды.

«Өтініш бере алатын екінші санат – жеке кәсіпкерлер. Ол кісілер де өткендегідей өтініш береді. Олардан да міндетті зейнетақы жарналарын талап етпейміз. Бір ғана талап – сол жеке кәсіпкер орналасқан аудан, қаладағы штабтар, «Атамекен» өкілдері бұл кәсіпкердің жұмысы тоқтады ма, тоқтамады ма, белгілеп береді. Қосымша Салық комитетінің мәліметтерімен растайды. Өткенде, 42 500 теңге төлегенде, өкінішке қарай, 40 мыңға жуық жеке кәсіпкерлер 42 500 теңгені алды, бірақ кейін Салық комитетінің мәліметі бойынша жұмыстары жүріп жатқанын анықтадық», - деп хабарлады Нұрымбетов.

Үшінші санат – өзін өзін жұмыспен қамтып жүрген азаматтар.

«Бұл санаттағы азаматтар өткен жолы 42 500 теңгені алу үшін бірыңғай жиынтық төлем төледі, бұл жолы ондай төлем жасаудың қажеті жоқ. Ол мәліметтер бізде бар. Бұл жерде тек өтініштеріңізді тастайсыздар», - деп түйіндеді сұрақтарға жауап берген Нұрымбетов.

Кенжекей Тоқтамұрат, Нұр-Сұлтан