Қазақстанға бірыңғай қаржы омбудсмені қызметі не үшін қажет

Бірыңғай қаржы омбудсмені қызметі азаматтардың қарыздарын қайта құрылымдау, яғни төлем шарттарын жеңілдету мәселелерін шешуге көмектеседі. Бұл туралы Қаржы нарығын реттеу және дамыту агенттігінің төрағасы Мәдина Әбілқасымова мәлімдеді, деп хабарлайды Azattyq Rýhy.

Әбілқасымова бұған дейін тек төлемдік қарыздарға қатысты шағымдарды қарайтын банк омбудсмені болғанын, енді оған тұтынушылық қарыздарды да қарау міндеті жүктелгенін, сондай-ақ биыл микроқаржы омбудсмені құрылғанын атап өтті. Сонымен қатар елімізде сақтандыру омбудсменінің кеңсесі де бар.

«Енді осы үш құрылымның негізінде Бірыңғай қаржы омбудсмені қызметі құрылады. Қазір осы қызметті құру үшін шамамен бір жылдық өтпелі кезең қарастырылған. Бұл жаңа қызметтің жұмысы үшін нақты ережелер мен азаматтардың өтініштерін қарау тәртібі анықталуы керек. Сондай-ақ бюджет қалай қалыптасатынын шешу керек. Омбудсмен қызметі қаржы ұйымдарының жарналары, яғни банктердің, сақтандыру және микроқаржы ұйымдарының қаражаты есебінен қаржыландырылады», - дейді Әбілқасымова Мәжіліс кулуарында.

Оның айтуынша, бірыңғай омбудсмен қызметіне қажеттілік азаматтардың өтініштерінің едәуір бөлігі проблемалық қарыздарды қайта құрылымдауға қатысты болуымен байланысты.

«Көп жағдайда адамның бірнеше қарызы бар — әрі банктерде, әрі микроқаржы ұйымдарында. Әр ұйым өз шарттарын ұсынады. Ал азаматтарға бірізді, келісілген шарттар ұсынылуы үшін Бірыңғай қаржы омбудсмені қызметін құру ұсынылып отыр. Сондай-ақ, өтініштердің көптігін ескере отырып, осы қызметтің қызметкерлер санын арттыру жоспарда бар. Ол бұрынғыдай қаржы секторының өз қаражаты есебінен қаржыландырылады», - деді агенттік төрағасы.

Әбілқасымова қаржы ұйымдарының көпшілігі Алматыда шоғырланғандықтан, үш омбудсмен де сол қалада екенін атап өтті.