Жасанды интеллект 1 млн қазақстандықтың жұмысын «тартып алуы» мүмкін

Еңбек және халықты әлеуметтік қорғау вице-министрі Олжас Анафин автоматтандыру мен цифрландыру еліміздің еңбек нарығына қалай әсер ететінін айтты, деп хабарлайды Azattyq Rýhy.

«Министрлік автоматтандыру мен жасанды интеллектінің Қазақстандағы жұмыспен қамтуға әсерін бағалау бойынша зерттеу жүргізді. 423 кәсіп тобына жасалған талдау нәтижесінде жұмыс орындарының шамамен 25%-ы немесе 2,2 миллионы, орташа және жоғары автоматтандыру қаупіне ие екені анықталды. Оның ішінде 1 миллионнан астамы генеративті жасанды интеллект есебінен алмастырылуы мүмкін», - деді Анафин Мәжілісте өткен дөңгелек үстелде.

Оның айтуынша, әсіресе Алматы, Астана және Шымкент сияқты ірі қалаларда қауіп жоғары.  Мұнда автоматтандыру жұмыс орындарының үштен біріне дейін әсер етуі ықтимал. Салалар арасында ең осал бағыттар — қаржы, ақпараттық технологиялар, ғылым және денсаулық сақтау.

«Бірақ нарықтан жұмысшыларды жаппай ығыстырады деп күтудің қажеті жоқ. Қазақстанда еңбек құны салыстырмалы түрде төмен болғандықтан, автоматтандыру біртіндеп, компаниялар экономикалық тиімділігін көргеннен кейін ғана жүзеге асады. Мұнымен қоса дрондар мен роботтандырылған техника операторлары, деректер мен киберқұқық саласының мамандары сияқты жаңа мамандықтар пайда болады», - деп сендірді Олжас Анафин.