Келесі жылы Ұлттық қордан балалардың шотына 100 доллардан көп түседі
Ақша қаңтар айының басында аударылады
2025 жылдың басында «Ұлттық қор – балаларға» жобасы аясында кәмелетке толмаған балалардың шотына 100 доллардан көп ақша түседі. Бұл туралы Ұлттық банк төрағасының орынбасары Әлия Молдабекова айтты, деп хабарлайды Azattyq Rýhy.
Осы жылдың он айы ішінде Ұлттық банк Ұлттық қорды басқарудан 5,3 млрд доллар пайда тапқан.
«Естеріңізде болса, былтыр әр балаға шамамен 100 доллар аударған едік. Бірақ 2023 және 2024 жылдар инвестициялық кіріс тұрғысынан өте позитивті жыл болды. Сол себепті келесі жылдың қаңтарында балалар арасында бөлінетін сома 100 доллардан көп болуы мүмкін», - дейді Молдабекова Ұлтттық банкте өткен брифингте.
Ол нақты сома балалар санына байланысты болатынын атап өтті. Балалардың шотына төлемдер қаңтар айының басында аударылады.
