Ипотекамен үй сатып алғандар да декларация тапсырады – министр

Бір жыл ішінде ипотека арқылы құны 73 миллион теңгеден асатын пәтер сатып алғандар да жалпыға ортақ декларация тапсырады. Бұл туралы қаржы министрі Мәди Тәкиев мәлімдеді, деп хабарлайды Azattyq Rýhy.

Кеше Үкімет қарапайым халық жалпыға ортақ декларациядан босатылатынын мәлімдеген. Алайда кейбір санаттағы азаматтар үшін декларация сол күйі қалады, олардың арасында бір жыл ішінде құны 20 000 АЕК-тен (биыл 73 млн теңге) асатын қандай да бір дүние-мүлік сатып алғандар да бар.

Осыған байланыстыAzattyq Rýhy тілшісі Мәжіліс кулуарында қаржы министрінен «Отбасы банк» арқылы ипотека рәсімдеп, баспаналы болғандар да декларация тапсыра ма деп сұрады.

Тәкиевтің айтуынша, егер баспана құны 73 миллион теңгеден асып кетсе, мейлі оның жартысы қарыз ақша болсын, пәтер иесі декларация тапсыруға міндетті.

«Сіз де мұндай жағдайда декларация тапсырасыз. Декларация тапсырғанда екі көзді көрсетесіз: мысалы 40 млн теңге өз ақшаңыз, қалған 40 млн теңге Отбасы банктен алынған қарыз деп. Қарыз болса да қарамайды, декларация тапсырасыз», - деп жауап берді министр.

Айта кетері, елімізде 8 миллионнан астам адам жалпыға ортақ декларациядан босатылды. Олар жеке құрылымдардың қызметкерлері, зейнеткерлер, үй шаруасындағы әйелдер, студенттер және тағы басқалары.

Бірақ шетелде активі барлар, бір жыл ішінде құны 20 000 АЕК-тен (73 млн теңге) асатын дүние-мүлік сатып алғандар, өз бетінше салық салынатын табыс тапқандар жыл сайын декларация тапсыруға міндетті болады.