Республикалық бюджетке берілетін трансферттер қаражатын біртіндеп азайту жалғасады – Жамаубаев

Парламент палаталарының бірлескен отырысында Премьер-министрдің орынбасары – Қаржы министрі Ерұлан Жамаубаев 2022 жылғы бджет туралы баяндады, деп хабарлайды Azattyq Ruhy.

«Ұсынылып отырған 2022 жылғы республикалық бюджет туралы Үкімет есебі Мәжіліс пен Сенатта жете талқыланып, қарастырылды. Өткен жылы пандемиядан кейін экономиканың жандануы байқалды. Ұлттық қордың қаражатын үнемдеу саясатын жалғастыру мақсатында республикалық бюджетке берілетін трансферттер қаражатын біртіндеп азайту жалғасады. Сондай-ақ Ұлттық Банкпен бірлесіп, оның инвестициялық кірістерін арттыруға қатысты шаралар қабылданып жатыр», - деді ол.

Министр атағандай, бұл Мемлекет басшысының Ұлттық қордың қаражатын 2030 жылға қарай 100 млрд. долларға дейін жеткізу жөніндегі тапсырмасын орындауға мүмкіндік береді.

«Қазіргі уақытта қолданыстағы 10 ұлттық жобаның іс-шараларын Мемлекеттік жоспарлау жүйесіне және өзге де құжаттарға интеграциялау бойынша жұмыс аяқталуда. Нақты салаларды дамытуға бағытталған 2029 жылға дейінгі 15 тұжырымдама бекітілді. Олар Президенттің сайлауалды бағдарламасын іске асыру жоспарымен үйлестірілген.Сондай-ақ, жаңа форматтағы «Жайлы мектеп», «Ауылдағы денсаулық сақтауды жаңғырту» ұлттық жобалары бекітілді. «Қолжетімді интернет» жобасы әзірленді. Сөйтіп, нақты проблемаларды шешуге бағытталған қысқа əрі нұсқа құжаттар форматына көшу жүзеге асырылуда», - деді ол.