Қазіргі «Орда» тобы кезінде «Гүлдер» сияқты жай биші болған – Алмат Сақатов жігіттерді қалай жинағанын айтып берді (ВИДЕО)

Қазақстандағы ең алғашқы әзіл театрларынан шыққан актер, режиссер Алмат Сақатов «PodcastTIME!» жобасына берген сұхбатында аты аңызға айналған «Орда» тобындағы жігіттердің басын қосқан өзі екенін айтып берді, деп жазады Azattyq Rýhy.

Подкасттағы журналист Алмат Сақатовқа: «қазір «Жайдарман» ойнап, кейін еліміздің сатира театрларында өнер көрсетіп жүрген актерлер бар, тіпті, техникалық мамандықта оқып, артынан «Жайдарман» арқылы актер болып кеткен адам бар. Бұл болашақта жеке дара мамандықтардың жойылуына әкеп соқмай ма?» деген сұрағын қойды.

Бұл сұраққа қатысты ойын айтқан Сақатов қандай да бір өзгеріс бірден емес, жылдар өте келе байқалатынын айтты. Мысал ретінде ол құрылғандарына 25 жылдай уақыт болған «Орда» тобының тарихын айтып берді.

«Бұның өзгеретініне күмәнім жоқ. Біз өзгеріс бірден болады деп ойлаймыз ғой. Мысалы, «Орда» деген топ бар ғой. Ерболат, Есболат, Жанболаттарды мен Астанаға барғанда бірінші рет көрдім. Ал, Дастан мен Рүстемді «Бауыржан шоуға» мен алып келгемін. Олардың билеп жүргенін көрдім. Олар «Гүлдер» ансамблі сияқты жай биші болған.  Бірде бесеуі шүйіркелесіп жатты, сырттарынан қарап отырдым да «мына үшеуін неге алып алмаймын, екеуі өлең айтады. Ана үшеуіне фонограмма бар. Ән айта алмайтын мен, Әбунасырдың әндері хит болып» жатыр деп үш жігітті екеуіне қосып алдым. Аяғында, осы топтың стилін берген Ерболат. Ерболат олардың биі мен киімін көрсетті. Осылайша, олар әнші болып шыға келді. Қазір топтың өмір сүргеніне 20 жылдың ар жақ-бер жағы болды. Ал кезінде олар Қазақстанның балаларына жаңа стиль әкелген еді», - деп еске алды Сақатов.