«Әр сөзі философия»: Алматыда «Хакім Абай» атты шығармашылық кеш өтті

Алматыда «Толық адам, ой толғау, Хакім Абай» атты моно-опера, моно-реквием шығармашылық кеші өтті. Қазақтың бас ақыны Абайдың ой-толғамдарын, өлеңдерін насихаттауға арналған шығармашылық кеш мектеп оқушыларына арналды, деп хабарлайды Azattyq Ruhy ақпараттық агенттігі.

Ұлы Абайдың, хакім Абайдың әрбір өлеңін, оның ой-толғамдарын оқушыларға өзгеше әдіспен түсіндіріп, жеткізуші – Қазақстанның еңбек сіңірген қайраткері Шахимардан Әбілов. Құнды пікір, терең ой, асыл сөздер, адамды адалдыққа, адамзатты бауырмалдыққа бастайтын өзгеше сипатта өткен кешке кілең оқушылар қатысты. Мемлекеттік сыйлықтың иегері Шахимардан Әбілов хакім Абайдың ойын түсінген, оның шығармашылығымен сусындаған, асыл қасиеттерін бойына сіңірген жастардың жанары нұрға бөленіп, жүрегі жақсылыққа толып тұрады дейді.

«Әрине, Абай – әлемдік тұлға. Зерттеп байқасақ, қандай ғұлама, қандай мықты философ болсын, біздің Абай солардың арасынан табылады. Абайды оқысам, көңілім толады. Бір адамға Абайдың сөздерін жеткізсем – сол менің бақытым. Моно-опера менің 40 жыл бойы аңсап келген бағдарламам, соны былтыр бірінші рет жарыққа шығардым. Биыл Президент халыққа жолдауында айтқаны бар, ол – толық адам. Біз Абайды оқысақ, Абайдың ойын ұқсақ, ел боламыз. Әлемдегі дамыған елдердің қатарына қосыламыз. Сондықтан менің бүгінгі концертім еліме, оқушыларға арналады. Біз мына кең байтақ жерде тұрып жатқан әдемі елміз, өзгеше халықпыз. Тек біз білім алуымыз керек», - деді Қазақстанның еңбек сіңірген қайраткері Шахимардан Әбілов.

Моно-опера, моно-реквием кеші дарынды балаларға арналған оқушылардың инновациялық шығармашылық орталығында өтті. Жуырда ғана пайдалануға берілген Алатау ауданындағы инновациялық орталықта да концерт бірінші бірінші рет ұйымдастырылды. Белгілі әнші, вокалдық лириканың тамаша орындаушысы Шахимардан Әбіловтың есімі Қазақстанда ғана емес, одан тыс жерлерде де кеңінен танымал. Бүгінде Әбілов – республикамыздың музыкалық мәдениетінде ерекше орын алатын өнер иесі. Әнші шығармашылығының шыңы Абай өлеңдеріне камералық-вокалдық шығармаларды орындауы болды. Осы орайда оқушылардың әдеби әрі мәдени танымдылығын арттыру мақсатында аталмыш өнер иесімен кездесу кеші арнайы ұйымдастырылды.

«Мұхтар Әуезов жазып кеткен «Абай жолы» романын үнемі оқуымыз керек. Мен жастарға бір сәуле берсем, жүректеріне ұлағатты қуат берсем, онда арманым жоқ. Әрине, қала әкімдігіне, қалалық білім басқармасына рақмет. Олар мені арнайы шақырып, «жастарға, оқушыларға Абайды айтыңызшы, оның жазып, айтып кеткен ойларын жеткізіңіші» деп өтініш жасады. Міне, сол ойымыз орындалды. Әрине, Абайдың өлеңдері, әр сөзі, әр өлеңі - жай сөз емес, жүректен шыққан терең мағыналы сөздер, асыл ойлар. Абай ғасырлар бойы өз қалпында қала береді, оның әр сөзі – бір философия», - деді әнші.

Концертті тамашалауға 300-ге жуық оқушымен қатар, қала мектептерінің мұғалімдері де келді. Дарынды балалар мен жасөспірімдердің шығармашылығын қолдауға арналған орталық 3 қабаттан тұрады. Оқушылардың шығармашылық дамуына бұл орталықта барлық жағдай жасалған. Аптасына 5000-ға жуық бала үйірмелерге тегін қатыса алады.

«Бұл біздің орталығымыз ашылғалы алғашқы концерт беруіміз. Қазақстанның еңбек сіңірген қайраткері Шахимардан Әбіловтың «Толық адам, ой толғау, Хакім Абай» атты моно-опера, моно-реквием шығармашылық кешін жоғары деңгейде өткіздік. Оған қаланың әр ауданынан оқушылар қатысты, зиялы қауім өкілдері, ұлт ұстаздары да келді. Президент айтып өткендей, біз ұрпақтар сабақтастығын жалғастыруымыз керек. Бүгінгі шараны ұрпақтар сабақтастығы деп қабылдау керек. Абай атамыздың өлеңдерінде жастарға үлгі болатындай қаншама өлеңдер, өнегелі сөздері жатыр. Инновациялық орталықта 35-тен астам үйірме бар. Экологиялық тәрбие беру, эстеттикалық шығарма, аспаптық өнерлер және ғылыми жобаларға балалар тегін қатысады. Бізде бір күнде мыңға жуық оқушы келеді. Аптасына бес мыңға жуық бала үйірмелерге қатысып жүр. Тек Алатау ауданы ғана емес, бүкіл қала бойынша оқушылар орталықтағы үйірмелерге тегін  қатыса алады», - деді Оқушылардың инновациялық шығармашылық орталығының кураторы Манас Тайкенов.