Қазақстандық топ Түркияда өтіп жатқан музыка фестивалінде өнер көрсетті

Этно-фольклорлық бағытта өнер көрсететін қазақстандық «Тұран» тобы Түркияның Мерсин қаласында өтіп жатқан музыка фестивалінде сахнаға шықты. Бұл туралы Azattyq Rýhy ttjk.info-ға сілтеме жасап хабарлайды.

20-шы Мерсин халықаралық музыка фестивалінің мүдделі тарапы болып Торослар муниципалитеті саналады.

Торослар мэрі – Атсыз Афшин Йылмаз. Ол Торослар тауында тігілген жергілікті киіммен сахнаға шығып, «Тұран» этно-фольклорлық тобымен «Anayurt marsi» туындысын шырқады.

Серік Нұрмолда, Бауыржан Бекмұханбет, Мақсат Медеубек, Ержігіт Әлиұлы және Жанту Дәдібай секілді жігіттерден құралған топ ескі ұлттық аспаптардың үнін заман талабына сай орындап, концертте өнер сүйер қауымның қошеметіне бөленді.

Атсыз Афшин Йылмаз концерттен кейін «Тұран» этно-фольклорлық тобына естелік тақтасын және арнайы әзірленген ерекше топтамасын, сол сияқты екі күміс монета сыйлады.

«Түркия Республикасында 2021 жылы басылған екі күміс теңге бар. Бұлар менің коллекциямнан. Соның бірі Қазақстан Республикасының 30 жылдығына орай басылған. Бұл монетада «Түркі» сөзі жазылған. Қазақстанды көктүріктердің, ғұндардың, сақтардың және Алтын Орданың мұрагері, түрік әлемінің жүрегі деп атайды. Біз үшін бұл теңгелер өте құрметті. Екіншісі – Ғұн мемлекетінің күміс теңгесі. Оны біздің топ мүшелеріне ұсынамын» – деді.