Елбасы «Абай Арена» ұлы ақынның атында қалуға тиіс деп есептейді
Семейдегі «Абай Арена» спорт ғимаратына ҚР Тұңғыш Президенті Нұрсұлтан Назарбаевтың есімін беру бастамасы көтерілді
Елбасы Нұрсұлтан Назарбаев Семейдегі стадион қазақтың ұлы ақыны Абай Құнанбаевтың атында қалуға тиіс деп есептейді. Бұл жайында Елбасының баспасөз хатшысы Айдос Үкібай хабарлады.
«Әлеуметтік желілер мен БАҚ-та ШҚО белсенділерінің «Абай арена» стадионының атауын өзгерту туралы ұсынысы талқылануда. Елбасы әрдайым өзіне қатысты мұндай «құрмет-қошеметке» қарсы. Н.Назарбаевтың пікірінше, стадион қазақтың ұлы ақыны әрі философының атында қалуы керек», - деп жазды ол.
Еске сала кетейік, Семей қалалық мәслихатында зиялы қауым өкілдері, атақты спортшылар, еңбек сіңірген қайраткерлер, ардагерлер, ҮЕҰ, БАҚ өкілдері, еріктілер қозғалысының белсенділері, жастар мен ірі кәсіпорындар жетекшілерінен құралған бастамашыл топтың хаты қаралды. Ол хатта Қарағайлы ықшам ауданындағы атаусыз көшеге Нұрсұлтан Назарбаевтың есімін беру және осындағы мәдени-спорт кешенін «Елбасы Арена» деп атау ұсынылған.
