Абай атындағы мемлекеттік сыйлықтың иегерлері анықталды

Абай атындағы әдебиет пен өнер саласындағы 2020 жылғы мемлекеттік сыйлықтың иегерлері анықталды. Мемлекет басшысының жарлығымен мемлекеттік сыйлыққа ие болған ақын-жазушылардың тізімі төмендегідей:

• «Абыз Әбіш» зерттеуі үшін – мәдениеттанушы Сауытбек Абдрахманов;
• «Көкейімде Күлтегіннің жазуы» өлеңдер жинағы үшін – ақын Серік Ақсұңқар;
• «Ғұлама-наме» трилогиясы үшін – жазушы Ғарифолла Есім;
• «Ұлы Дала әдебиеті» тарихи-әдеби зерттеулер жинағы үшін – әдебиеттанушы Мырзатай Жолдасбеков;
• «Достояние души» өлеңдер жинағы үшін – ақын Бақытжан Қанапиянов;
• «Сарра» драматургиялық шығармалар жинағы үшін – драматург Роза Мұқанова;
•  «Періштелердің өлімі» прозалық шығармалар жинағы үшін – жазушы Тынымбай Нұрмағанбетов.

Еске сала кетейік, 2020 жылдың 9 қаңтарындағы Мемлекет басшысы Қасым-Жомарт Тоқаевтың «Абай және ХХІ ғасырдағы Қазақстан» атты мақаласында бұдан былай әдебиет және өнер саласындағы үздік шығармаларға берілетін мемлекеттік сыйлық енді Абай атындағы мемлекеттік сыйлық деп аталатынын мәлім етті.