Roblox ойын платформасында балалар жыныстық сипаттағы контентті еркін тұтынған

Әлемдегі ең танымал ойын платформаларының бірі Roblox-та балаларға бөтен ересектермен сөйлесуге тыйым салынды. Бұл шара Австралия, Жаңа Зеландия және Нидерландыда іске асқан, жаңа жылдан бастап басқа елдерге де қолданылады, деп хабарлайды Azattyq Ryhy.

ВВС-дің жазуынша, енді платформада әр қолданушының жасы тексеріледі. АҚШ-тың бірнеше штатында Roblox-қа шағым түскен. Платформа кәмелетке толмаған балаларға жыныстық сипаттағы контент тұтынуға және ересектермен еркін сөйлесуіне мүмкіндік берген.

Roblox қосымшасында жасын тексеру үшін камера арқылы бет сканері қолданылады. Бұл жүйе 5-тен 25 жасқа дейінгі пайдаланушылардың жасын шамамен 1–2 жыл дәлдікпен анықтай алады. Пайдаланушылар мынадай жас топтарына бөлінеді:

• 9 жасқа дейін
• 9–12 жас
• 13–15 жас
• 16–17 жас
• 18–20 жас
• 21+

Қолданушылар тек өз жас тобына сәйкес адамдармен сөйлесе алады, тек «сенімді байланыс» функциясын пайдалану арқылы басқа адамдарға қосыла алады. 13 жасқа дейінгі балаларға жеке хабарламалар мен кейбір чаттарға ата-анасының рұқсаты сұралады.

2024 жылы Roblox платформасын күнделікті 80 миллионнан астам адам пайлаланған, олардың шамамен 40%-ы 13 жасқа дейінгі балалар болды.