Дубайдан Гонконгқа ұшқан жүк ұшағы теңізге құлады (ВИДЕО)
Ұшақ апатынан екі адам қаза тапты
Гонконг халықаралық әуежайында Boeing 747 жүк ұшағы ұшу-қону жолағынан шығып кетіп, жердегі техникалық қызмет көлігімен соқтығысып, кейін теңізге құлаған, деп жазады Azattyq Rýhy.
Оқиға салдарынан көлікте болған екі қызметкер қаза тапты: олардың бірі судан табылса, екіншісі ауруханада көз жұмған.
Жүк ұшағы Emirates әуе компаниясының EK9788 рейсін орындаған, бағыты Дубай – Гонконг. Ұшақ экипажының мүшелері зардап шекпеген.
Азаматтық авиация департаменті оқиғаның себептерін анықтау үшін тергеу жұмыстарын бастады. Әуежай әкімшілігінің мәліметінше, 12 жүк рейсінің ұшатын уақыты кейінге шегерілген.
Ұшақ шығып кеткен солтүстік ұшу-қону жолағы уақытша жабылды, ал орталық және оңтүстік жолақтар әдеттегі режимде жұмыс істеп тұр.
