Сирия 13 жыл үзілістен кейін Ливиядағы елшілігін қайта ашты

Сирияның Араб Республикасының Ливиядағы елшілігі 13 жылдық үзілістен кейін қайта жұмысын бастады, деп хабарлайды Azattyq Rýhy.

Ресми мәліметке сәйкес, Сирия сыртқы істер министрлігінің делегациясы Ливия астанасында уақытша штаб-пәтерде консулдық қызметтер көрсете бастады.

Бұған дейін екі ел арасындағы байланыстардың жақсаруының белгісі ретінде Дамаск халықаралық әуежайынан Триполиға «Syrian Airlines» әуе компаниясының алғашқы тікелей рейсі ұшқан болатын.

Сондай-ақ, биыл сәуір айында Антальяда өткен дипломатиялық форумда Ливия премьер-министрі Абдель Хамид Дбейба мен Сирияның уақытша президенті Ахмед аш-Шараа екі ел арасындағы ынтымақтастықты күшейту мақсатында арнайы комитет құруға уағдаласты.

Мамыр айында Сирияның өтпелі үкіметінің Сыртқы істер министрі Асаад аш-Шейбани Ливияда елшілік пен консулдықты қайта ашу ниетін жариялаған еді.

Айта кетейік, Сирияның Триполидегі дипломатиялық өкілдігі 2012 жылы, 2011 жылдан басталған Сирия қақтығысы кезінде жабылған болатын.