Нетаньяху Макронды антисемитизмді қоздырды деп айыптады

Франция президенті Эммануэль Макронның қыркүйекте БҰҰ Бас Ассамблеясының сессиясында Палестина мемлекетінің тәуелсіздігін мойындауға дайын екендігі туралы мәлімдемесі «антисемитизмді қоздырады» деген айыпқа ие болды. Бұл туралы Израиль премьер-министрі Биньямин Нетаньяхуның француз көшбасшысына жолдаған хатында айтылған, деп хабарлайды Azattyq Rýhy.

«Сіздің Палестина мемлекеттілікті құруға шақыруыңыз осы антисемиттік отқа май құйғанмен бірдей», – деп жазды Израиль премьері. 

Хат мәтінін Politico басылымы жариялады.

Нетаньяху өз үндеуінде соңғы айларда Францияда болған «антисемиттік оқиғаларға» тоқталып, оларды Францияның Израильге қатысты саясатының салдары деп атады.

Оның айтуынша, Париждің шешімі «ХАМАС террорын қолдайды, қозғалыстың тұтқында ұстаған адамдарды босату ниетін әлсіретеді, француз еврейлеріне қауіп төндіргендерге батылдық береді және Франция көшелерін жайлаған еврейлерге деген өшпенділікті өршіте түседі».

Өз кезегінде Макрон әкімшілігі бұл айыптауларды «қате әрі жиіркенішті» деп атап, «бұл жауапсыз қалмайды» деп уәде берді.

Франция президентінің өзі де Нетаньяху айтқан айыптауларды «қате әрі күлкілі» деп сипаттап, «республика еврейлерді қорғайды және әрқашан қорғайды» деді.

Сонымен қатар, Euronews-тің дерегінше, Францияда антисемиттік әрекеттердің саны расында да 2023 жылғы 7 қазандағы ХАМАС-тың Израильге жасаған шабуылынан кейін күрт артқан. Франция полициясының мәліметінше, 2024 жылы 1570 антисемиттік әрекет тіркелген, бұл діни өшпенділікке негізделген барлық қылмыстардың 62 пайызын құрайды.

Францияда Батыс Еуропадағы ең ірі еврей қауымы – шамамен 500 мың адам өмір сүрсе, сондай-ақ, Таяу Шығыстағы жағдайға ерекше алаңдайтын араб-мұсылман қауымы да өте көп.

Эммануэль Макрон 7 қазандағы оқиғадан кейін бірден Израильге қолдау білдіріп, Биньямин Нетаньяхуға жиі қоңырау шалып тұрған. Алайда уақыт өте келе байланыс азайып, Франция президенті Газа секторындағы Израиль әрекеттерін сынағандардың қатарына қосылды.